राजेशमान सिंह एमाले प्रतियाग गर्ने र जसपामा प्रवेश गर्दै

वीरगञ्ज - केही साता अगाडी मात्रै लोकतान्तिक समाजवादी पार्टी (लोसपा) त्यागेर नेकपा एमाले प्रवेश गरेका राजेशमान सिंह अब जनता समाजवादी पार्टी (जसपा) प्रवेश गर्दै छन् ।

आफूसँग धोका भएको भन्दै एमाले पनि त्यागेर सिंहले जसपा रोजेका हुन् । सिंहले चैत ७ गते पोखरीया आयोजना हुने कार्यक्रममा जसपा प्रवेश गर्ने बताइएको छ । 

संविधानसभा सदस्य राजकुमार गुप्ता समूहसँग वीरगञ्ज महानगरपालिकामा मेयरको टिकट पाउने आश्वाशनसहित सिंहले एमाले प्रवेश गरेका थिए । तर, एमाले पर्सा भित्रकै अर्को समूहले उनका प्रतिद्वन्द्वीसमेत रहेका वीरगञ्जका मेयर विजय सरावगीलाई पार्टी प्रवेश गराएपछि उनि अन्योलमा परेका थिए । 

सरावगीलाई पनि एमालेका अध्यक्ष केपी शर्मा ओलीले पार्टीको तर्फबाट वीरगञ्ज महानगरको मेयरको टिकट दिने आश्वासन दिएका छन् । सरावगीको प्रवेशसँगै सिंह र उनिमध्ये पार्टीबाट मेयरको टिकट कसले पाउँछ भन्ने विषयमा एमाले भित्र पनि मतान्तर बढ्दै गएको थियो । 

यद्दपी, एमाले भित्र टिकट पाउने दौडमा निर्वाचित मेयरले प्राथमिकता पाउने देखिएपछि सिंह जसपामा जाने निस्कर्षमा पुगेको हुन् । 

गत स्थानीय तहको निर्वाचनमा पनि वीरगञ्जको मेयरका लागि सिंह र सरावगीले प्रतिश्पर्धा गरेका थिए । मतपरिणाम सरावगीको पक्षमा आए पनि गत साढे ४ वर्षको अवधिमा सिंहले गरेको कामबाट सबै प्रभावित छन् । 

अर्कोतर्फ सिंहले पर्सामा प्रभावशाली नेता सङ्घीय सांसद् प्रदीप यादवको पनि साथ पाएका छन् । विजय सरावगी तत्कालनी सङ्घीय समाजवादी फोरममा रहेको बेला उनलाई वीरगञ्जको मेयर बनाउने पर्दा पछाडीको व्यक्ति प्रदीप यादवलाई मानिन्छ । 

व्यापारिक पृष्ठभूमिबाट सरावगीलाई राजनीतिमा ल्याएर मधेश प्रदेशकै एक मात्र महानगर वीरगञ्जको मेयर बनाउने यादवको सबैभन्दा ठूलो हात थियो । सोही यादव अबले सिंहलाई साथ दिरहेका छन् ।

स्थानीय तहको निर्वाचन घोषणा भएसँगै पछिल्लो एक महिनाभित्र पर्साको राजनीतिमा ठूलो उथलपुथलहरु भएका छन् ।  कुनै समयमा एक अर्काका प्रतिश्पर्धी मानिने प्रदीप यादव र राजेशमान सिंह आज एकै ठाउँमा उभिएका छन् भने त्यही यादवले राजनीतिमा ल्याएका व्यक्ति विजय सरावगी आज उनको सबैभन्दा ठूलो आलोचक बनेका छन् । 

निर्वाचन आउँन अहिले पनि दुई महिना बाँकी रहँदा अरु कस्ता परिवर्तन होला भन्ने कुरा समयले नै बताउँछ ।