मधेश प्रदेश सरकारप्रति ओलीको कटाक्ष- नारामा बेटी बचाउ, व्यवहार साइकल पचाउ

भक्तपुर– नेकपा एमालेका अध्यक्ष केपीशर्मा ओलीले मधेश सरकार भ्रष्टाचारमा लागेको आरोप लगाएका छन् ।

भक्तपुरमा आज एमाले पर्सा–काठमाडौँ सम्पर्क मञ्चले गरेको कार्यक्रममा अध्यक्ष ओलीले मधेश प्रदेश सरकारको नारामा ‘बेटी बढाउ, बेटी बचाउ’ रहे पनि व्यवहार साइकल पचाउ रहेको आरोप लगाएका हुन् ।

उनले मधेश सरकारको नारा र व्यवहार फरक रहेको भन्दै कटाक्ष गरेका छन् ।

‘नारा लगाउँदा ‘बेटी पढाउ, बेटी बचाउ’ भन्ने । व्यवहारमा साइकल पचाउ काम । तपाईँहरूको प्रदेश २ को आकर्षक नारा सुन्नुभयो होला,’ ओलीले भने ।

साइकल खरिदमा भ्रष्टाचार भएको उजुरी परेपछि अख्तियार दुरुपयोग अनुसन्धान आयोगले मधेशका गत असोज १३ गते मुख्यमन्त्रीको कार्यालयमा छापा मारेको थियो । प्रारम्भिक अनुसन्धानमा कार्यालयले भ्रष्टाचार गरेको अख्तियारले ठहरसमेत गरेको थियो । यही घटनाक्रमलाई लिएर ओलीले यस्तो टिप्पणी गरेका हुन् ।

मधेश प्रदेश पर्यटकको हिसाव एकदमै राम्रो रहेको भन्दै उनले सुनकोसी डाइभर्सन बनेपछि यस क्षेत्रको सिँचाइ सुविधा पुग्ने बताए ।

अध्यक्ष ओलीले धार्मिक पर्यटनको हिसावले मधेश प्रदेश उत्कृष्ट रहेकोसमेत बताएका थिए ।