भारत निर्यात हुन थाल्यो नेपाली सिमेन्ट, परीक्षणका लागि तीन ट्रक पठाइयो

२४ असार,काठमाडौं । नेपालबाट भारतमा सिमेन्ट निर्यात हुन थालेको छ । पश्चिम नवलपरासीको सुनवल ७ मा रहेको पाल्पा सिमेन्टले उत्पादित सिमेन्ट भारतमा निर्यात गरेको हो ।

शुक्रबार एक समारोह गर्दै पाल्पा सिमेन्टले ‘तानसेन’ ब्रान्डको सिमेन्ट भारततर्फ निकासी गर्न औपचारिक शुभारम्भ गरेको हो ।

पहिलो दिनमा नै तीन ट्रक सिमेन्ट भारतमा गएको छ । सरकारले चालु आर्थिक वर्षदेखि सिमेन्ट निर्यात गर्दा ८ प्रतिशत नगद अनुदान दिने व्यवस्था समेत गरेको छ ।

पाल्पा सिमेन्ट इन्डष्ट्रिज लिमिटेडका जनसम्पर्क प्रवन्धक जीवन निरौलाका अनुसार नेपाल सिमेन्टमा आत्मनिर्भर भइसकेको छ । त्यसैकारण अब भारतीय बजारमा निर्यात गर्न सुरु गरिएको कम्पनीले जनाएको छ ।

जगदम्बा, सर्वोत्तम, सौर्य, अर्घाखाँचीलगायत सिमेन्ट उद्योग पनि निर्यातको तयारीमा छन्।